012 664 8871 dsat@downs.org.za

Medical News

Oogtoestande wat kan voorkom by kinders met Downsindroom

Deur R Pouwels

Dr. Gideon du Plessis het vir ons ‘n baie insiggewende lesing gegee oor die verskillende oogtoestande wat kan voorkom by kinders met Downsindroom. Ons is nou deeglik bewus van die belang van oogtoetse by kinders met Downsindroom. Dr. du Plessis spesialiseer in oogprobleme by kinders en sien ook verskeie kinders met Downsindroom. Hy het die regte kennis in verband met die hantering van kinders.
NB: Kinders met Downsindroom is visuele leerders.
Visuele afwykings sal hul vermoë om te leer baie belemmer.

Dit is baie jammer dat net ‘n paar ouers die aand kon bywoon maar ons sal hom weer by ‘n ander geleentheid vra om die lesing te kom aanbied.

Die volgende toestande kan voorkom:

1. Epikantriese voue: dit is deel van die vorm van die gesig, dit wil voorkom asof die kind skeel is maar dit is nie werklik so. Die voue verdwyn soos die kind ouer word en die gesig groei.

2. Blepheritis: dit is ‘n kroniese ontsteking van die ooglid. Dit kom voor by kinders wat ‘n droë vel het. Daar is skubbe sigbaar tussen die ooghare. Dit genees moeilik. Maak skoon met louwarm water en babasjampoe.

3. Traanklierontsteking: die oë traan kronies en gaan
gepaard met herhaalde konjunktivitis (ontsteking). Die oorsaak hiervan het te doen met die verlaagde spiertonus in kinders met Downsindroom. Dreinasie geskied deur die knip van die oog. As gevolg van die verlaagde spiertonus is daar dus verminderde vloei van vog in die traanklier.

4. Nystagmus: dit is onwillekeurige pendulêre oog bewegings. Dit kom by 10% van kinders met Downsindroom voor. Die brein onderdruk die bewegings van die oog en dit het dus nie’n groot invloed op die visie nie. Dit kan nie behandel word nie.

5. Strabisme: (squint) dit kom by 20% van kinders met Downsindroom voor. Daar is 2 tipes skeelheid. Die “infantile” tipe kan met ‘n operasie herstel word en die “focal related” tipe kan met ‘n bril gekorrigeer word. Die lae spiertonus moet ook in gedagte gehou word, dit beïnvloed ook die werking van die oogspiere. Indien strabisme nie korrek hanteer word nie, kan die kinders ‘n “lui
oog” kry.

 

Dit kan reggestel word met ‘n oogklap vir die sterk oog of deur druppels in die sterk oog te gooi, wat die sterk oog uitskakel en die ander oog dwing om te fokus.

6, Refraktiewe foute: dit is onder andere versiendheid, nabysiende en astigmatisme. Vir die toestande kan daar ‘n bril voorgeskryf word.

7. Brushfield kolle: dit is wit kolle op die iris van die oog. Dit het geen noemenswaardige betekenis nie.

8. Katarakte: dit kom by 1% van kinders met Downsindroom voor. Dit is oorerflik. ‘n Lens inplanting moet op ‘n jong leeftyd gedoen word.

9. Keratokonus: dit kom by 10-15% van adolessente met
Downsindroom voor. Die kornea word dun en bolvormig. Dit kan behandel word met harde kontaklense of ‘n kornea oorplanting.

10. Gloukoom: dit kom baie min voor. Dit word gekenmerk deur groot oë met ‘n dowwe kornea. Die persoon kan nie lig in die oë verdra nie. Dit is goed behandelbaar met chirurgie.

Kinders met Downsindroom moet deur ‘n oogarts ondersoek word as hul 18-24 maande oud is.